Umwana w’umukobwa w’imyaka 14 y’amavuko yarohamye mu mugezi w’Akanyaru arapfa, ubwo yari yajyanye na bagenzi be koga. Umurambo we wabonetse ku wa 15 Ukwakira 2026, nyuma y’umunsi umwe yarohamye.
Iyi mpanuka yabereye mu Mudugudu wa Kivugiza, Akagari ka Mututu, Umurenge wa Kibirizi, mu Karere ka Nyanza.
Amakuru yatangajwe n’IGIHE avuga ko uyu mwana yarohamye ku wa 14 Ukwakira 2026, ubwo yari yagiye koga mu mugezi w’Akanyaru ari kumwe n’abandi bana.
Umunyamabanga Nshingwabikorwa w’Umurenge wa Kibirizi, Burezi Eugene, yavuze ko ubuyobozi bwamenye iby’uru rupfu, bugakuramo umurambo w’umwana bukawohereza mu Karere ka Gisagara, aho basanze yarakomokaga.
Yagize ati: “Ni byo koko twamenye amakuru tubona umurambo we tuwukuramo tuwohereza mu karere ka Gisagara kuko twasanze ariho yari yakomotse.”
Nyuma y’iyi mpanuka, Burezi Eugene yasabye ababyeyi kujya bakurikirana abana babo, bakamenya aho bari n’ibyo bakora kugira ngo bafashe kwirinda impanuka zishobora gutwara ubuzima bwabo.
Iyi mpanuka iributsa ababyeyi n’abarezi ko gukurikirana abana no kubigisha kwirinda ibyago biri mu bidukikije ari ingenzi mu kurengera ubuzima bwabo.
