Queen Elizabeth Makune, wabaye Nyampinga wa Tanzania mu 2018, yongeye kugaruka mu marushanwa y’ubwiza, yegukana ikamba rya Miss Universe Tanzania 2026.
Makune yambitswe iri kamba mu birori byabereye i Dar es Salaam mu ijoro ryo ku wa 20 Nzeri 2026, aho yahize abandi bakobwa bari bahataniye guhagararira Tanzania mu irushanwa rya Miss Universe.
Uyu mukobwa w’imyaka 30 yari asanzwe azwi mu marushanwa y’ubwiza, nyuma yo kwegukana ikamba rya Miss Tanzania mu 2018. Kuri iyi nshuro, yongeye kwigaragaza imbere y’abitabiriye ibi birori, ahabwa amahirwe yo guhagararira igihugu cye ku rwego mpuzamahanga.
Nyuma yo kwegukana ikamba rya Miss Universe Tanzania 2026, Queen Elizabeth Makune azahagararira Tanzania mu irushanwa rya Miss Universe 2026, riteganyijwe kubera muri Puerto Rico.
Iri rushanwa rizaba ku nshuro ya 75, rikazitabirwa n’abakobwa bahagarariye ibihugu bitandukanye byo ku isi.
Kuri Makune, iyi ntsinzi ibaye andi mateka mu rugendo rwe mu marushanwa y’ubwiza, nyuma y’imyaka umunani kuva yegukanye ikamba rya Miss Tanzania.
Abakunzi b’imyidagaduro n’amarushanwa y’ubwiza muri Tanzania ubu bahanze amaso ku myiteguro ye, mu gihe azaba ahagarariye igihugu cye kuri Miss Universe 2026.
