Umunya-Argentina ukomeye mu mateka y’umupira w’amaguru, Lionel Messi, biravugwa ko yaba yarageze ku bwumvikane bw’ibanze bwo kugura imigabane myinshi mu ikipe ya Eldense yo muri Espagne, ikina mu cyiciro cya kabiri.
Eldense yatangaje ko habayeho “ubwumvikane bw’ibanze” hagati yayo na Messi ku bijyanye no kugura imigabane yari isanzwe ifitwe na sosiyete Grupo TH Soluciones. Ibi biramutse birangiye, Messi yahita aba umunyamigabane mukuru w’iyi kipe.
Gusa, iyi gahunda ntirarangira burundu kuko hakiri ibisabwa mu mategeko n’amasezerano, birimo igenzura ry’imari n’ibikorwa by’ikipe (due diligence), ndetse n’uruhushya rutangwa n’Urwego rw’Igihugu rwa Siporo muri Espagne (CSD).
Messi akomeje gushora imari mu mupira w’amaguru wa Espagne
Eldense yaba ikipe ya kabiri yo muri Espagne Messi agiye gushoramo imari.
Muri Mata 2026, Messi kandi yaguze ikipe ya Cornellà, ikina mu cyiciro cya gatanu cy’umupira w’amaguru muri Espagne.
Eldense ibarizwa mu ntara ya Alicante. Ikipe yatangiye shampiyona nabi, aho nyuma y’imikino ine ifite amanota abiri gusa, ikaba iri ku mwanya wa 20 muri La Liga 2.
Muri iki cyumweru kandi, iyi kipe yatandukanye n’umutoza wayo Claudio Barragán.
Messi n’amateka ye muri Espagne
Lionel Messi yagiye muri Espagne afite imyaka 13, nyuma aza gutangira gukina mu ikipe ya mbere ya Barcelona afite imyaka 17, mu Ukwakira 2004.
Mu myaka yamaze muri Barcelona, yanditse amateka akomeye cyane, atsinda ibitego 672 mu mikino 778, akaba ari we mukinnyi watsinze ibitego byinshi mu mateka y’iyi kipe.
Yavuye muri Barcelona mu 2021 ajya muri Paris Saint-Germain, mbere yo kwerekeza muri Leta Zunze Ubumwe za Amerika mu 2023, aho akinira Inter Miami.
Messi akurikira inzira yatangijwe na Cristiano Ronaldo
Messi si we mukinnyi ukomeye wo muri iki gihe watangiye gushora imari mu makipe yo muri Espagne gusa.
Uwahoze ari mukeba we ukomeye, Cristiano Ronaldo, usanzwe akinira Al-Nassr muri Saudi Arabia, muri Gashyantare 2026 yaguze imigabane ingana na 25% muri Almería, nayo ikaba ari ikipe yo muri Espagne.
Mugihe amasezerano ya Messi na Eldense arangiye neza, azaba afite uruhare rukomeye mu micungire n’iterambere ry’iyi kipe, mu gihe azaba akomeje umwuga we wo gukina muri Inter Miami.
BBC Sport dukesha iyi nkuru yatangaje ko yagerageje kuvugana na Lionel Messi kugira ngo agire icyo avuga kuri aya makuru, ariko kugeza ubu nta gisubizo cye kiratangazwa.
