Abantu 23 bamaze guhitanwa n’ibiza bitandukanye byatewe n’imvura y’Umuhindo yo mu mezi ya Nzeri na Ukwakira 2026, mu gihe hari n’ibikorwaremezo byangiritse hirya no hino mu gihugu.
Umuyobozi Mukuru ushinzwe Igenamigambi no gukumira Ibiza muri Minisiteri y’Ibikorwa by’Ubutabazi (MINEMA), Adalbert Rukebanuka, yavuze ko mu bahitanywe n’ibi biza harimo abagwiriwe n’ibirombe ndetse n’abishwe n’inkuba.
Yasobanuye kandi ko umuyaga mwinshi wibasiye uduce dutandukanye wangije inyubako, aho watwaye ibisenge by’amashuri n’izindi nyubako, bigira ingaruka ku bikorwa by’abaturage.
Mu rwego rwo kugabanya ingaruka z’ibiza no kurinda ubuzima bw’abaturage, inzego zibishinzwe zikomeje gushyira mu bikorwa ingamba zitandukanye zo gukumira no guhangana na byo.
Muri izo ngamba harimo gukora ubukangurambaga bugamije gukangurira abaturage kwirinda ibiza, gusesengura no kumenya ahantu hashobora kwibasirwa na byo, ndetse no gushyiraho abantu bashinzwe gukurikirana ibyo bice kugira ngo ibibazo bishobore kumenyekana hakiri kare.
Izi ngamba zigamije gufasha abaturage kumenya ibyago bashobora guhura na byo, gufata ingamba zo kubyirinda no kugabanya ibihombo by’ubuzima n’iby’umutungo biterwa n’ibiza.
Abaturage barasabwa gukomeza kwitwararika mu gihe cy’imvura, kwirinda ahantu hashobora guteza ibyago birimo ibirombe bishobora gusenyuka, no gukurikiza amabwiriza atangwa n’inzego zibishinzwe.
