Perezida wa Uganda, Yoweri Kaguta Museveni, yagejeje ku bayobozi bakuru b’ishyaka National Resistance Movement (NRM) icyifuzo kijyanye n’uko umuhungu we, Gen. Muhoozi Kainerugaba, ashobora kuzamusimbura ku butegetsi, mu gihe ibiganiro ku murage wa politiki we bikomeje gufata indi ntera.
Iki kibazo cyaganiriweho mu nama ya Komite Nyobozi Nkuru ya NRM (CEC) yabereye i Entebbe ku wa 27 Ukwakira 2026. Nk’uko ibinyamakuru byo muri Uganda birimo ChimpReports na Nile Post byabitangaje, Museveni yagejeje ku bayobozi b’ishyaka inyandiko igaragaza ibitekerezo bye ku uzamusimbura, mu gihe yanagarutse ku bukungu, ubufatanye bw’ibihugu byo mu karere no kongerera ubushobozi ingabo.
Mu gusobanura impamvu atekereza ko Gen. Muhoozi ashobora kumusimbura, Museveni yamugaragaje nk’umuntu ukunda igihugu, ushyigikira ubumwe bw’Afurika kandi uharanira kurwanya ruswa.
Yashimangiye uruhare umuhungu we yagize mu kurwanya ruswa mu gisirikare, kunoza imikorere ya Leta no kongerera ubushobozi ingabo za Uganda n’inzego z’umutekano.
Museveni kandi yagarutse ku ruhare rwa Muhoozi mu kubaka umutwe w’ingabo zidasanzwe uzwi nka Special Forces Command, ndetse no mu bikorwa bya gisirikare byo kurwanya imitwe y’inyeshyamba mu Majyaruguru ya Uganda no mu Burasirazuba bwa Repubulika Iharanira Demokarasi ya Congo (RDC).
Yanavuze ku bikorwa by’ingabo za Uganda byo kurwanya umutwe w’iterabwoba wa Al-Shabaab muri Somalia, birimo ibyakorewe i Mogadishu no mu gace ka Lower Shabelle, ndetse n’ibikorwa byo guhangana n’umutwe wa Allied Democratic Forces (ADF) mu Burasirazuba bwa RDC.
Ku butumwa Muhoozi akunze gutangaza ku rubuga rwa X bukavugisha benshi, Museveni yavuze ko we ubwe atabona ko ari ikibazo, ndetse ko hari ubwo abona bufite akamaro.
Icyifuzo cya Museveni cyashyigikiwe na bamwe mu bayobozi ba NRM, barimo Haruna Kasolo, Visi Perezida w’ishyaka mu karere ka Buganda, na Dr. Tanga Odoi uyobora Komisiyo y’Amatora y’iryo shyaka.
Icyakora, Hadijah Namyalo, uyobora Ibiro bya Perezida wa NRM, yagaragaje ko atagishyigikiye. Yanagaragaje impungenge z’umutekano we nyuma y’uko abamurindaga bakuweho ku itegeko rya Muhoozi. Museveni yamusubije ko icyo kibazo gishobora gukemurwa.
Nk’uko ChimpReports yabitangaje, Museveni yabwiye abagize CEC ko ibyifuzo by’abanyamuryango benshi ari byo bizitabwaho, abasaba kandi kugira ibanga ibiganiro byabereye muri iyo nama.
Nubwo hari abayobozi bagaragaje ko bashyigikiye Muhoozi, amakuru yatangajwe nyuma y’inama ntiyagaragaje ko CEC yafashe icyemezo cya nyuma cyo kumugena nk’uzahagararira NRM mu matora ya Perezida.
Iki kiganiro kije nyuma y’igihe havugwa ko Gen. Muhoozi ashobora kuzasimbura se umaze imyaka 40 ayobora Uganda, kuva mu 1986.
Mu Ukwakira 2022, Museveni yabajijwe ku cyifuzo cy’umuhungu we cyo kuzaba Perezida, asubiza ko Muhoozi ari umunyamuryango wa NRM kandi ko agomba kugendera ku byemezo by’ishyaka.
Ku wa 1 Nzeri 2026, Depite Daudi Kabanda, umwe mu bayobozi ba Patriotic League of Uganda (PLU), ihuriro rishyigikiye Muhoozi, yatangaje ko Gen. Muhoozi afite gahunda yo kwiyamamaza mu matora ya Perezida ateganyijwe mu 2031. Kabanda yanavuze ko Museveni ashyigikiye icyo cyifuzo.
Kugira ngo Muhoozi abe umukandida wa NRM mu matora ya Perezida yo mu 2031, bizasaba ko hakurikizwa inzira zemewe z’ishyaka n’amategeko agenga amatora muri Uganda.
