Perezida wa Iran, Masoud Pezeshkian, yavuze ko Abanya-Iran babaye “ibitambo by’iterabwoba” ryakozwe na Leta Zunze Ubumwe za Amerika, mu ijambo rikomeye yagejeje ku Nteko Rusange y’Umuryango w’Abibumbye (UN) ku wa Gatatu, tariki ya 23 Nzeri 2026.
Pezeshkian yagejeje iri jambo i New York mu gihe intambara hagati ya Iran, Amerika na Israel ikomeje guteza umwuka ukomeye mu Burasirazuba bwo Hagati. Iri jambo ryaje nyuma y’umunsi umwe Perezida wa Amerika, Donald Trump, avuze ko ashobora “gusenya burundu” Iran mu gihe habura amasezerano yo guhagarika imirwano.
Mu ijambo rye, Pezeshkian yagaragaje amafoto y’uwahoze ari Umuyobozi w’Ikirenga wa Iran, Ali Khamenei, ndetse n’abana b’Abanya-Iran barenga 150 bivugwa ko bishwe mu ntangiriro z’iyi ntambara.
Yavuze ko Iran itatangije ibitero ahubwo ko yarimo kwirwanaho nyuma y’ibitero byagabwe ku gihugu.
Yongeyeho ko abaturage ba Iran, barimo abana, bagabweho ibitero ndetse ashinja Amerika na Israel kuba ari bo bateye igihugu cye.
Perezida wa Iran yavuze kandi ko nubwo Amerika yagabye ibitero kuri Iran, igihugu cye kitigeze “gupfukama” imbere y’igitutu cya Washington.
Mu gice cya nyuma cy’ijambo rye, Pezeshkian yerekeje ubutumwa kuri Trump, avuga ko Iran yiteguye ibiganiro na diplomasi, ariko ko itazemera imvugo cyangwa ibiganiro bishingiye ku gukoresha imbaraga.
Ati: “Twiteguye ibiganiro na diplomasi ndetse n’imishyikirano, ariko tutemera imvugo y’imbaraga.”
Ibyo Pezeshkian yavuze byaje mu gihe Amerika na Iran byakomeje gutanga ubutumwa buvuga ku buryo bwo gushaka umuti w’iyi ntambara. Abayobozi b’ibi bihugu kandi bagiranye ibiganiro bitaziguye ku ruhande rw’Inteko Rusange ya UN, aho intumwa zombi zakoresheje abahuza.
Nubwo Pezeshkian yavuze ko Iran itigeze yibasira abaturage, amakuru ya Associated Press avuga ko abaturage, barimo abasare n’abakozi b’abimukira bo mu karere, bari mu bantu bishwe n’ibitero bya Iran kuva intambara yatangira.
Iyi ntambara ni imwe mu ngingo zikomeye ziganirwaho mu Nteko Rusange ya UN y’uyu mwaka, aho abayobozi b’ibihugu bitandukanye bakomeje gusaba ko habaho kugabanya umwuka mubi no kongera ibiganiro bya dipolomasi. Umunyamabanga Mukuru wa UN, António Guterres, na we yasabye abayobozi gukoresha iki gihe mu gushaka uburyo bwo kugabanya intambara no guteza imbere ibiganiro.
