Umukinnyi wa filime Tom Holland yemeje ku mugaragaro ko yamaze gushyingiranwa na Zendaya, ashyira iherezo ku makuru yari amaze amezi menshi avugwa ku mibanire yabo.
Mu kiganiro yagiranye n'ikinyamakuru Esquire UK, Holland yavuze amagambo yatumye benshi bemeza ko ubukwe bwabo bwabaye koko. Igihe ya bazwaga ku mafoto y’ubukwe yakwirakwijwe hifashishijwe ubwenge bw’ubukorano (AI), yasubije ko nta mpamvu yari ihari yo kubwira abo mu muryango we kuko “bose bari bahari”,
amagambo yasobanuwe nk’icyemeza ko ubukwe bwabaye mu ibanga.
Holland yanavuze ko Zendaya ari “inshuti ye magara” ndetse ko ari we muntu yifuza kubana na we ubuzima bwe bwose. Yagaragaje ko yishimiye cyane ubuzima bwabo bwite kandi ko bombi bahisemo kuburinda amaso y’itangazamakuru.
Amakuru y'uko aba bombi bashobora kuba barashyingiranywe yatangiye gukwirakwira nyuma y'uko Zendaya agaragaye yambaye impeta ya zahabu ku rutoki rw'ibumoso. Nyuma, umunyamideli we w'igihe kirekire, Law Roach, yatangaje ko “ubukwe bwamaze kuba kandi abantu bose babucikanywe.”
Tom Holland na Zendaya bahuriye bwa mbere mu ifatwa ry’amashusho ya filime Spider-Man: Homecoming mu 2016, maze bemeza urukundo
rwabo ku mugaragaro mu 2021. Bombi bakomeje kubarirwa mu byamamare bikunzwe cyane ku isi, cyane cyane kubera uburyo babashije kugumana umubano wabo mu ibanga igihe kirekire.
